《品味遊戲:去遊戲展睇Game不如識人》

文:Dixon Cheung

 

今個星期,遊戲界最大嘅盛事都莫過於一年一度嘅E3遊戲展喇。睇番每年E3,傳媒嘅報導來來去去不外乎Sony、任天堂、Microsoft三大巨頭嘅新機動向,加埋一眾遊戲大廠嘅最新消息。可能就係因為太過集中報導呢方面嘅嘢,所以最近有朋友就話,年年E3都係差唔多,實在覺得好冇新意,好悶喎。

其實,對於業界嚟講,E3嘅價值絕對唔止係睇吓Game Trailer同睇次世代主機咁簡單。E3係全球最多媒體同讀者關注嘅遊戲展,所以响E3聚集嘅人亦係業界當中最優秀嘅精英。由於遊戲係一個非常依賴「人」嘅行業,所以對於做遊戲嘅人嚟講,E3同埋同類嘅遊戲展,最值錢嘅並非產品,而係「人」。

無論係E3抑或係世界各地嘅遊戲展,每一個展覽都係業界朋友擴展人脈嘅大好機會。好可惜,擴展人脈呢點,往往令好多埋頭寫code嘅朋友感到抗拒甚至反感。「我整game㗎咋,做乜要我出去見人?」假如我同你講,香港某隻著名音Game係因為去咗台灣參展,認識咗當地嘅音樂人,繼而喺台灣獲獎然後爆紅呢?香港某團隊喺新加坡Casual Connect獨立遊戲展中,亦都獲投資者同營運商睇中,繼而成功喺東南亞獲取巨大成果。一年當中,實在有太多大大小小嘅遊戲展覽,喺世界各地舉行,所以類似嘅故事,响業界中亦相當多。幾乎每一個外出參展嘅團隊,都有一兩個故事可以分享。

可能你會話:「我邊有咁多錢飛過去參加展覽呀?」冇錯,呢個一直都係困擾住香港本地遊戲開發者多年嘅問題。機票、酒店、參展嘅費用的確並非幾個得閒圍埋整game嘅朋友可以輕易負擔,所以有部份外國嘅獨立遊戲展覽主辦商就會撥出少量名額,免除參展費用之外,甚至會俾埋住宿,務求令多啲獨立遊戲開發者有機會交流同曝光。當然,閣下嘅遊戲作品必須係有誠意同水準之作啦!例如Casual Connect同埋台北電玩展每年都有近千個來自世界各地嘅遊戲作品申請,要脫而出獲得免費參展同住宿資格,真係非常唔容易㗎!

不過就算冇得去外國都唔使愁嘅。其實近年一啲國際上比較知名嘅遊戲展覽同活動亦開始選擇香港作為展覽嘅地方。例如MGF(國際手機遊戲論壇)就喺2016年嗰陣,响尖沙咀美麗華酒店入面舉行。嚟緊2018年,Casual Connect亦表示有意喺香港舉行。成日話冇好Game玩嘅朋友,唔好止步於主流大作喇,索性行入遊戲展,用自己對眼搵出未被媒體發掘同報道嘅有趣作品啦!

Dixon

擁有超過30年遊戲玩家經驗,熱愛挖掘全球各地不同遊戲,涉獵範圍包括:家用遊戲機、電腦遊戲、手機遊戲和卡牌桌遊等。曾任職廣告公司擔任創作總監,擅長將遊戲引入各種企劃。於2013年創立獨立遊戲開發團隊,先出擔任該團隊遊戲設計師及監製一職。 Facebook Page: www.fb.com/dixon.gamer

More Posts

Follow Me:
TwitterFacebook

Dixon

擁有超過30年遊戲玩家經驗,熱愛挖掘全球各地不同遊戲,涉獵範圍包括:家用遊戲機、電腦遊戲、手機遊戲和卡牌桌遊等。曾任職廣告公司擔任創作總監,擅長將遊戲引入各種企劃。於2013年創立獨立遊戲開發團隊,先出擔任該團隊遊戲設計師及監製一職。 Facebook Page: www.fb.com/dixon.gamer

發表評論