《品味遊戲:角色扮演遊戲背後的靈魂 – Knights of Pen and Paper 2》

文:Dixon Cheung

今期嘅《品味遊戲》想同大家講番一款推出咗都一段時間嘅作品,不過響「炒冷飯」之前,我想先問大家一個問題:你有冇試過發「夢中夢」?

有睇過Leonardo Di Caprio主演嘅電影《Inception》(港譯《潛行凶間》)的話,相信對夢中夢呢個concept唔會感到陌生。(未睇嘅,建議睇咗套戲先,我個人覺得係近十年必睇電影之一)今次想同大家品味嘅《Knights of Pen and Paper 2》(以下簡稱KoPP2),正好就同「夢中夢」有點類似。因為呢款遊戲入面,玩家將要飾演「玩家」呢個角色。

可能係因為最近玩番桌遊RPG嘅關係,打開《KoPP2》,見到Game Master攞住本guide book坐響檯後面,檯前面擺住兩張凳仔,果種桌遊感撲面而來得嚟真係非常貼地。對於冇玩桌遊RPG嘅朋友嚟講,可能對Game Master呢個名詞比較陌生。其實最早期嘅RPG係冇電腦做輔助嘅。戰鬥判定、角色能力提升、劇情推動,全部由主持大局嘅Game Master人手操作,所以原本GM嘅工作唔係齋踢人出隻Online Game咁簡單㗎!

《KoPP2》係一款Gag味相當重嘅遊戲。玩家需要挑選每個參與呢場「遊戲中嘅遊戲」嘅勇者,由有錢仔、運動狂、書蟲、Rock友、滑板仔等「玩家」擔任人族、精靈族或矮人族嘅劍士、法師、忍者、僧侶等傳統RPG角色。劇情方面,《KoPP2》絕對可以令熟悉歐美文化嘅「宅男」笑到碌地。無論係遊戲一開場個時作弊玩家單挑終極怪獸搞到怪獸喊住逃走,抑或係走入地底迷宮瘋狂惡搞Fallout,遊戲中不停穿插一眾「玩家」同Game Master之間嘅抵死對白,出其不意嘅Gag位實在令呢個遊戲生色不少。

 

至於戰鬥系統方面,《KoPP2》採用回合制:敵人分為前後兩排,按先後次序輪流採取行動。玩家可以利用團隊內五個角色配搭出十三種職業配搭,然後以各式各樣手段攻退敵人。選擇遠攻能力較強嘅法師同獵人無視排位擊殺後排,抑或由防禦力較高嘅角色拉住仇恨再由忍者一擊必殺?呢種舊式嘅回合制戰鬥系統,實在係眾多「睇佢打多過自己打」嘅課金手遊當中嘅一道清泉。

我最近同一班朋友傾計,個個抱怨課金手遊玩到好悶,覺得好無腦。篤兩下畫面睇電腦自己打,跟住就要課金抽嘢實在好弱智。偏偏呢班人又覺得呢啲遊戲先係RPG,話自己好中意RPG…  其實難聽啲講,個窿本身就係班出得起錢嘅遊戲公司擺響度嘅,你自己又唔願意望吓其他地方,係都要埋怨呢度有個窿跟住自己又跳入去,怪得邊個?一講到RPG,好多人第一時間就會提起Final Fantasy同Dragon Quest。至於有玩歐美遊戲嘅朋友好快就列出Skyrim、Witcher同Fallout之類。久而久之,部份人就覺得有Level升、有怪打、有裝儲嘅就係RPG。老鬼啲講句,果啲關Role Play(角色扮演)乜事?一個精彩嘅RPG遊戲,除咗需要精美嘅場景,炫目嘅戰鬥,更重要嘅係令玩家置身其中嘅故事同氣氛。《KoPP2》優勝嘅地方絕對唔係佢嘅畫面有幾多3D Model或者用埋Unreal Engine搞到啲光影位幾震撼,有時候玩番最原始嘅RPG,擲吓骰仔、同GM互動搞吓Gag,好過做課長扭蛋同守城啦。

 

《Knights of Pen and Paper 2》

Steam:
http://store.steampowered.com/app/310060/Knights_of_Pen_and_Paper_2/

Google Play:
https://play.google.com/store/apps/details?id=com.paradoxplaza.kopp2&hl=en

Apple App Store
https://itunes.apple.com/nz/app/knights-of-pen-paper-2/id901787752?mt=8

Dixon

擁有超過30年遊戲玩家經驗,熱愛挖掘全球各地不同遊戲,涉獵範圍包括:家用遊戲機、電腦遊戲、手機遊戲和卡牌桌遊等。曾任職廣告公司擔任創作總監,擅長將遊戲引入各種企劃當中。於2013年創立獨立遊戲開發團隊Fingerprint Studio,先後獲得多個香港及海外獨立遊戲大獎。 Facebook Page: www.fb.com/dixon.gamer

發表評論