《E3 2018 一場娛樂性超越遊戲嘅Show》

文:Dixon

E3 2018終於曲終人散。經過連日嚟嘅展覽報道,相信各位Gamer朋友,對於自己關心嘅遊戲同廠商,都有一定程度嘅收穫。不過既然E3稱得上係一場Show,咁佢嘅娛樂性部份又點止Gameplay片段、又或者係製作人訪問呢?當大部份人都集中追緊新Game消息嗰陣,唔知你又有冇留意到各個遊戲廠商喺呢場一年一度嘅大Show入面嘅表現呢?

Switch XBox PS4三分天下藏暗湧

任天堂Switch嘅出現,令原本兩雄割據嘅局面再次成為三分天下。可惜今年任天堂Labo嘅失敗,令原本氣勢如虹嘅Switch,遭受到自推出以來最嚴重嘅一次挫折。我個人原本認為E3會係任天堂翻身洗底嘅大好時機,可惜今年任天堂响E3 42分鐘嘅Show Time當中,竟然用咗24分鐘去介紹《任天堂明星大亂鬥特別版》一隻遊戲!而剩餘嘅時間入面,亦唔見有咩特別大作值得令人驚喜。呢個舉動除咗係白白浪費咗一個大好時機,同時亦令任天堂暴露咗唔夠獨家大作嘅問題。

若果話任天堂今年喺E3嘅表現令人惋惜,咁Microsoft今年E3嘅表現亦實在令人無言。Microsoft喺展覽嘅Show Time中展示咗一堆新遊戲,無奈獨家遊戲方面就只得《Forza Horizon 4》一隻賽車game比較搶眼,其餘遊戲例如《Halo》、《Gears of War》儘管一如既往有出色表現,但始終唔係一隻「值得為呢隻Game而考慮買部機」嘅獨家遊戲。相比之下,反而Show Time後段介紹嘅獨立遊戲作品,例如《Planet Alpha》,更加令我感到驚喜。

至於Sony PS4,喺獨家遊戲方面,PS4今年絕對係大贏家。兩款獨家遊戲《蜘蛛俠》同《The Last of Us 2》早喺舊年已經種下咗玩家嘅寄望。今年E3一出Gameplay影片,馬上贏盡觀眾掌聲喝彩。而新遊戲《Ghost of Tsushima》亦有精湛表現,現場氣氛可以話係三大廠商中最好嘅一個。不過,正正係因為氣氛咁好,Sony竟然响Show Time中途嗌半場休息,並且要求全體觀眾同媒體移師去另一個場館繼續下半部份展覽…… 大佬,你當而家睇TVB咩!「廣告番嚟,我哋去2號廠睇吓嗰邊嘅節目……」一句轉場,現場人士要用腳行,啲嘢要重新set位㗎!呢個從未發生過嘅舉動,令在場人士,包括媒體,都感到莫名其妙。更大鑊嘅係,換咗場地之後嘅第一個節目,竟然係現場演奏遊戲音樂…… 原本難得累積好嘅現場氣氛被呢次奇怪嘅搬兜事件徹底打亂,阻礙咗整體節目嘅流暢度,實在令人有畫蛇添足嘅感覺。

Bethesda懂得玩家心思 成就最佳表現

 

除咗家用機嘅戰場之外,玩家最關心嘅當然係各大遊戲廠商喺E3當中嘅表現啦!個人嚟講,我覺得今年表現最出色嘅都算係Bethesda。呢間遊戲公司出咗名把口密實,從來出Game都係要人等到頸都長埋,先俾少少嘢你頂吓癮。今次佢就先以Online Game Co-Op玩法嘅Fallout作品《Fallout 76》打頭陣。覺得《Fallout 76》唔係單機版正傳續作咩?接下來再介紹《Doom Eternal》同《Rage 2》兩款正規續作,再介紹一啲比較二線嘅遊戲。當觀眾開始睇到咁上下,估計應該到戲肉嘅時候,Bethesda就俾個驚喜大家,宣佈全新科幻RPG系列《Starfield》登場。再趁觀眾滿足咗之後,臨完場學Steve Jobs嚟個 「Oh, by the way」,同觀眾講「《上古卷軸6》嚟啦,去片!」Bethesda今年喺E3嘅Show Time,無論節目嘅鋪排,抑或內容,都完全超越咗玩家預期,充分表現呢間遊戲公司對顧客嘅重視同了解程度。

面係人哋俾,架係自己丟

作為一場大Show,有「蝦碌」(出糗)場面係在所難免。無奈有啲尷尬位置卻並非一時過失咁簡單。正如上面講到,Bethesda對玩家嘅了解同重視令呢間公司響今年E3贏盡掌聲。另一邊廂,有啲遊戲公司就唔夠了解玩家,同時亦高估咗自己,令公司醜態畢露。例如年年都《Just Dance》嘅Ubisoft今年照舊都係載歌載舞, 仲特意搵人著咗套熊貓公仔服裝由場外跳到入會場舞台。 呃,Ubisoft,你都識叫隻Game做 《Just Dance 2019》啦,第一隻《Just Dance》到呢一代都已經十年啦…… 跳舞跳足十年,年年都係差不多嘅表演,呢度係E3,你唔係搞錯咗以為係《歡樂滿東華》呀嘛……

 

Ubisoft雖然年年跳舞冇新意,但都總算叫有隻《刺客信條:奧德賽》睇吓。相比之下, EA就更加係今年E3嘅尷尬之王! 無論係佢哋大聲宣佈新遊戲《Anthem》嘅賣點係唔使玩家課金,冇片睇齋講《Star War Jedi: Fallen Order》有得揸光劍好Amazing,抑或係興奮尖叫年年都出、年年都買剩嘅《FIFA 2019》九月上市…… EA種種令人「O嘴」嘅表現,再次證明咗呢間遊戲公司對玩家真係零了解兼且極不尊重。為咗追電競潮流,EA甚至刻意响介紹《Madden 2019》呢款美式足球遊戲嘅時候,安排一位名不經傳嘅Madden電競冠軍,孭住條Oversize嘅金腰帶,棟响台上同大家講佢由唔識玩到攞到呢款遊戲電競冠軍嘅血淚史…… 由畫面所見,大部份現場觀眾對呢位冠軍嘅認識,同香港街邊求其搵個人嚟問一樣。大家都係一副莫名其妙「你做乜訪問佢」咁嘅表情望住舞台,甚至係開始做自己嘢。 覺得尷尬嗎?EA完全冇留意到現場氣氛已經死晒,台上嘅冠軍繼續以佢懶有態度(其實係有少少囂張令人反感)嘅口吻,同個搞極都搞唔起氣氛嘅主持對答。我真係好好奇,EA搞呢個環節究竟係想表達咩?係想話俾觀眾知玩《Madden》都可以好似LOL電競冠軍咁威?還是想話俾觀眾知,冠軍是如何毀掉的?

E3不再係業界嘅競技場

其實過去十幾年,業界不斷都有聲音指遊戲開發團隊為咗喺E3上攞到好成績而疲於奔命。AAA級遊戲大作嘅開發往往係以User Experience嘅完成度去衡量,假若開發出來嘅部份未如理想,砍掉重做亦係常有嘅事。所以要咁啱夾到正E3嘅展期,去完成可以令玩家滿意同值得期待嘅內容,實在係一個非常巨大嘅壓力。正正係因為咁,Blizzard、Square Enix呢啲遊戲公司,近年都選擇咗與其逼死自己條Team要喺E3揭曉自己大作消息,倒不如等作品真係準備好,再喺冇競爭對手搶媒體注意嘅獨立遊戲發佈會中公佈消息。估計亦都係呢個原因,今年Square Enix喺E3發佈會當中對《Final Fantasy 7》隻字不提,甚至齋播已經曝光嘅片段,不惜令玩家公開喺網上大罵,都唔肯透露半句進一步消息。(又或者因為啲嘢真係唔見得人……)身為觀眾同玩家,你會希望每年熱熱鬧鬧一場show,定係寧願分散全年,各個廠商各自各精彩?

Dixon

擁有超過30年遊戲玩家經驗,熱愛挖掘全球各地不同遊戲,涉獵範圍包括:家用遊戲機、電腦遊戲、手機遊戲和卡牌桌遊等。曾任職廣告公司擔任創作總監,擅長將遊戲引入各種企劃當中。於2013年創立獨立遊戲開發團隊Fingerprint Studio,先後獲得多個香港及海外獨立遊戲大獎。 Facebook Page: www.fb.com/dixon.gamer

More Posts

Follow Me:
TwitterFacebook

Dixon

擁有超過30年遊戲玩家經驗,熱愛挖掘全球各地不同遊戲,涉獵範圍包括:家用遊戲機、電腦遊戲、手機遊戲和卡牌桌遊等。曾任職廣告公司擔任創作總監,擅長將遊戲引入各種企劃當中。於2013年創立獨立遊戲開發團隊Fingerprint Studio,先後獲得多個香港及海外獨立遊戲大獎。 Facebook Page: www.fb.com/dixon.gamer

發表評論