《品味遊戲:全城炒作VR 泡沫還是未來?(上)》

文:Dixon Cheung

過去兩個星期,台灣同日本分別舉行咗Digital Taipei以及東京電玩節兩個活動。藉著今次機會,來自世界各地嘅遊戲開發者又一次聚首一堂。新舊面孔走埋一齊,話題當然離不開遊戲世界嘅轉變同發展。返嚟香港之後,同大家分享一下所聽所聞,究竟2017年下半年嘅遊戲世界講嘅係咩話題?

VR真係咁好景?

過去兩年VR(虛擬實景)可以話係炙手可熱嘅話目。幾乎任何人只需交出一個似模似樣嘅VR遊戲,獨立遊戲展嘅主辦單位都會樂於提供攤位俾你展出作品。甚至有個別遊戲展講明要預留展位俾VR遊戲,唔係做VR遊戲嘅唔該讓一讓路,下屆再報名參加。係呢股VR熱潮之下,再加上媒體大肆報導,每一個VR遊戲都好似有機會成為明日之星。但其實做VR遊戲係咪真係咁好景?VR又係咪好似某啲人所講:「今日人人都做VR,你唔做嘅就冇得撈」呢?

我自己親身走訪幾個遊戲展,同好多製作VR遊戲嘅朋友傾計。發現VR雖然擁有極大潛力,無奈開發成本同風險亦非常高。有幾位開發VR遊戲嘅朋友表示,VR硬件較為昂貴,加上需要一定大小嘅空間先可以玩,一般人實在唔會輕易入手,直接影響作品嘅銷售。雖然過往好多遊戲都係因為媒體嘅報導爆紅,但VR遊戲始終唔會因為遊戲紅,屋企就有地方玩,結果不少VR遊戲出現「雷聲大收入少」嘅情況。根據同我交流嘅台灣、香港、日本以及美國VR遊戲開發者所講,佢哋嘅VR遊戲喺Steam上架半年,雖然口碑唔錯亦有媒體報導,但賣出嘅數量同金額都未如外界諗得咁理想,好多製作人甚至話可以打個和已經相當唔錯。可惜「打個和」對投資者嚟講係唔合格嘅表現,幾位曾經接觸過投資者嘅朋友都話班投資者睇完盤數之後就嫌賺得太少缺乏投資意欲。近日甚至有業界龍頭大哥響公開活動中表示,某中國內地嘅VR公司,今年虧損4千萬人民幣,最終黯然離場。

轉型商用亦觸礁

由於開發VR嘅費用高昂以及市場嘅局限性,唔少做VR遊戲嘅開發者今年都開始接埋商用嘅VR軟件工作。不過因為呢幾年太多IT公司為咗要趕及潮流,買套Occulus Rift同HTC返嚟就叫個Junior自己研究整d VR嘢吸客(美其名係話俾你做吓啲冇咁悶嘅嘢),縱使VR遊戲開發者擁有無窮創意,踏入商用領域之後亦頻頻聽到有人觸礁。際遇同人脈好啲嘅開發者都仲可以有機會見到個客報下價,但孑然一身同客戶比較少接觸嘅開發者,好多時連見個客一面嘅機會都冇就已經被IT公司攔腰接咗單Job。

可能會有人話:「冇可能!Freelance價錢做VR點會搶唔贏IT公司?接Job接到手軟就真啦!」如果真係咁嘅話,相信香港已經冇IT公司存在啦。正所謂你有張良計,我有過牆梯。曾經有朋友向我吐苦水,話原本準備同個客簽約,但一直幫開個客做網頁嘅公司突然話可以用Freelancer張報價一半嘅「優惠價」做埋單VR Job,條件就係網頁工作方面要同佢哋公司續約一年。由於個客本來就係長期搵呢間公司負責網頁嘅,而家仲有優惠價去試VR喎!結果之前開會幾次傾出嚟嘅嘢,所有構思同設計搞掂曬準備行得嘅嘢都「hold住先」。事隔數月,我嘅朋友再打電話問客人會唔會再考慮繼續做埋個Project。結果個客回覆:「唔啦!上次我哋做完個VR,都冇料到嘅!公司唔會再搞呢啲嘢啦!」賤價搶Job用罐頭嘢交貨,結果成效強差人意,嚇怕客戶唔肯再搞。同類事件喺過去一年不斷有所聽聞,呢啲咁嘅事件唔單止玩死咗不少有心有橋有能力嘅團隊,同時亦令VR蒙上「冇料到」嘅污名,嚴重打擊創意行業萌芽嘅機會。講到底,其實咪就係貪平同走精面呢兩樣香港精神累事囉。

VR同好多新科技一樣,剛剛出現嘅時候不斷受到吹捧,部份人趁機吸取大量資金,但過後進入調整期嘅時候,呢批吸金嘅人已經玩得七七八八向住下一個熱潮進發,剩低一班被用作開荒嘅朋友洗濕咗個頭陷入進退兩難嘅境地。其實同類嘅情況已經唔只一次發生。單機遊戲嘅時候發生過,Online Game年代發生過,今日喺VR身上發生嘅事,2013年左右喺手機遊戲市場亦出現過。無奈每一次人類都冇吸取教訓,總係覺得「今次唔同㗎啦!」令到歷史不斷重複。香港本身對科研同創意嘅資源同人才已經不足,一次又一次沉迷追捧熱潮令香港痛失好多機會同流失咗好多有心有力做嘢嘅人。就好似香港遊戲界某位前輩所講:「今日我哋繼續做嘅呢班人其實只係死剩種嚟。有好多好有能力嘅人睇住佢離場轉行真係覺得好浪費,好心痛。」每個行業都有人離開有人加入,但若果每次都要由零開始,吹捧完一輪俾班投機者刮一筆油水之後就拋棄的話,請問香港嘅遊戲界仲可以俾人利用多幾多次?

Dixon

擁有超過30年遊戲玩家經驗,熱愛挖掘全球各地不同遊戲,涉獵範圍包括:家用遊戲機、電腦遊戲、手機遊戲和卡牌桌遊等。曾任職廣告公司擔任創作總監,擅長將遊戲引入各種企劃當中。於2013年創立獨立遊戲開發團隊Fingerprint Studio,先後獲得多個香港及海外獨立遊戲大獎。

Facebook Page: www.fb.com/dixon.gamer

發表評論