《CosCompass主辦談世代問題 盼構建本地Cosplay社區》
記：JK｜受訪者：跨次元部落
「CosCompass」——這個陌生的名字，來自一個在今年12月31日舉辦，以Cosplay為主的同人活動。日前我們就跟主辦跨次元部落(S.S.R.)的朋友做了一個訪談。其實，在此之前我一直有一個疑問，究竟以Cosplay為主的攤位可以擺什麼內容呢？這個活動會否變成買賣淘寶貨的市集？直到跟對方見面，一邊吃飯一邊聊著成立活動的原意，才發現這個活動，甚至是這個名為「跨次元部落」的組織，都建基於一個共同的願景。
擔任主辦的「跨次元部落」，曾經舉辦過《白貓Project》綜合嘉年華「空島三缺一」、TYPE MOON Only HK 「宵月盛宴-Moon World Syposium」、《刀劍亂舞》互動劇場「清秋望月」及VOCALOID主題「初音縈繞~Back to the Miku~同人音樂會」等活動。他們表示，香港有Coser出現的同人活動雖然很多，但以Cosplay為主的同人活動是近乎沒有的，促成了這個CosCompass的契機。
CosCompass的緣起
「一直都覺得有需要，不過又見唔到有人做，所以咪自己捲衫袖囉！就係咁簡單嘅一件事。」
面對我問他們為何想舉辦「CosCompass」的問題，他們直接了當地說。
「香港雖然是有Rainbow Gala、Comic World等活動，但cosplay在當中都是依存同人誌即賣會的角色，甚至乎去到動漫節、C3動漫博覽會等，cosplay都是炒熱氣氛、幫助宣傳的存在，香港是未有一個以Cosplay為主的大型活動。」
「其實早幾年（2010去到2013年左右），喺香港嘅cosplay人口已經足夠撐起一個event，不過當時我地無咁能力去做，無人手無資源，最重要係當時我地覺得有其他人會去搞。」不過事實上並沒有人發起一個以Cosplay為主的Event，所以他們就自己「落水」了。三人都表示，自己是喜歡「去Event」多過「搞Event」的人，現在他們作為先行者，希望其他人會同樣會舉辦以Cosplay為主的活動，最終達至「遍地開花」的結果。
Cosplay世代更替 變化巨大
今次訪談的有「跨次元部落」其中一位男成員與兩位女成員，原來Cosplay年資也不少，他們說現在的Cosplay界跟以前非常不同。
「而家嘅資源係多咗，好似淘寶嘅出現，就已經令Cosplay嘅門檻大大降低。化妝品同各種cos用品都易入手好多。以假髮為例，好耐以前，玩Cosplay用的假髮，甚至有一啲係為咗癌症病人因電療脫髮下仍然可以正常生活而出現嘅醫療用品，價錢十分昂貴。後來雖然出現左一啲賣假髮嘅舖頭，但就算真係花錢買一個五百幾蚊嘅假髮，都未必可以肯定搵到同角色一樣嘅動漫髮色。」我這才發現，現在常見的所謂「高溫絲」和「烏絲」製作的假髮原來是00年代之後才出現的，以前所謂假髮是用尼龍造的，效果非常參差。
另一位女成員補充，以前的學生都不會一整套角色服買回來，要麼是沒有這個途徑，要麼是沒有錢，大家都是在不同的地方買衣服然後「魔改」成為角色服。
那麼，為甚麼會有專造Cosplay服的店開始出現？現在cosplayer想訂造服裝，找專造Cos服的店就可以了，很方便。原來這些店的由來，是以前有部分裁縫師傅，在幫cosplayer把日常服飾改成cos服的過程中，發現原來有一個這樣的市場，來來回回之間慢慢轉型成為專造Cos服的店舖。
香港現在還存不存在造Cos服的裁縫師傅？
「有，但已經少咗很多，而且你需要去主動問佢會唔會接（Cos服）單。因為Cosplay衫係比一般衣服複雜同麻煩好多，而玩Cosplay嘅人都係年輕甚至小朋友為主，可以比嘅錢唔多。啲師傅間中接一兩件呢啲Job當挑戰下自己，係幾有成功感嘅，不過長期做落去，就會覺得『好攰呀，我都係造番西裝旗袍好過啦。』咁多年嚟，我見到好多師傅出出入入呢行，會有新嘅師傅加入，但亦好多師傅覺得累又轉番做西裝呢啲傳統服裝。而近年就受惠於有演藝學院/IVE/CETA呢類學校教，都多了人懂得裁縫。」他們希望「CosCompass」可以作為一個媒介，讓大家沒有接觸過，或者相對來講比較難接觸到的產業部份「浮面」顯示出來。畢竟現在能夠隨意使用「網購」這種工具，其實也令有志者進入Cosplay產業變得容易很多。
出Cos門檻降低 壓力變相提高
「反過嚟講，『門檻降低』亦都係令Cosplay呢樣野變得好難。」主辦成員表示。「以前個個都知得嚟嘅野唔容易，大家都會比較寛容啲。唔戴假髮就用「噴頭」（染髮噴劑），顏色差唔多就可以了。但而家，有人會話『喂，明明淘寶有個一模一樣色嘅可以bid番嚟，點解你要戴個有色差架？你對眼一定係有問題啦。』咁樣喺度鬧。」
門檻容易了，大家要求高了，壓力就來了。女成員覺得這也許是其中一個「為甚麼以前會場氣氛比較開心，現在就好似很大壓力」的原因。
為何會在2017年的最後一日舉行？
「搵場真係超難。」男成員笑說：「因為好多原因，香港好多場地已經變得唔太歡迎cosplayer，有啲又因為本身設施問題，好難令大家玩得開心。柴青係現存嘅場地入面，對cosplayer比較親切嘅一個。而咁啱佢地係12月31號有期，我地果個book法亦都可以接近用哂成個場地 ，日子又係適合舉行大型活動嘅時間，所以先至會揀左呢日。」原來他們本來計劃「CosCompass」是在2018年新年之後才舉行的，但因為這個契機，才讓活動舉行的日子大大提早。
讓同人活動走向主流文化
其實不單是Cosplay，主辦的「跨次元部落」一直希望不要將同人活動侷限於小眾參與，而是讓其他人有渠道去接觸。「即係比佢地有個貼近大家少少嘅理解，唔好只係聽主流傳媒嘅譁眾取寵。以Cosplay嚟講，人地無記啲劇見到so call同cosplay有關嘅人同事，好多係用嚟笑，或者同負面嘅人格掛勾，唔識動漫嘅大眾，好多時見到嘅就係呢啲。」所以他們舉行的活動中，也有考慮到可以給大眾接觸的機會，例如選擇比較公開的場地、活動名稱有時也會不用「Cafe」或者「Only」等可能熟悉同人才知道意思的語言，多賣廣告等等。「我地發現每次活動時，都會有街外人好八卦咁 『咦有嘢玩啊，有嘉年華會，我入嚟睇下先 』 咁樣。希望透過比佢地親身接觸『真係喺度玩嘅人』，令佢地對ACG活動有一個正面、全面啲嘅認識。」
他們舉例，上年11月的《刀劍亂舞》互動劇場「清秋望月」，就採取了一個與主流表演文化相近的詮譯方式。「其實果個活動嘅構想呢，係可以直接包裝一個『有小劇場嘅café』。但係我地冒險少少，根據構思出呢個主義嘅伙伴嘅原主張，直接當成一個劇場咁去做。希望透過呢個做法，比《刀劍亂舞》嘅同好感受下新嘅活動方式，亦希望吸納到喜歡文化節目、看劇場的觀眾。」
CosCompass的攤位是否必須要手作？
主辦回答，報攤沒有列明一定要手作，但強調要是一手。「賣人地啲嘢係唔實際的，淘寶太方便了，你網上批量購買然後拿到活動現場賣，是冒很大風險的，別人也沒需要經你的渠道去買。如果講到明是要全新，會來的攤位多會是手作派，總之希望活動受眾唔會覺得自己去咗二手市集。」
重建本地連繫網絡
除了擺攤以一手為主外，另一點他們強調的是「溝通」。「賣物只係一個過程，溝通才是目的，讓攤主認識Coser，讓Coser認識攤主。」
一般賣物會的攤位是抱著一次性的心態去參加的，女成員表示，很多攤位都是臨時改個名字就去開攤，事後根本就不會再找到攤位的聯絡。今次活動，他們期望店舖能夠宣傳自己的存在，而非擺完一次展，然後就沒有然後了。他們認為店鋪本身可能有自己的OnlineShop，也會有希望長期「接單」和「光顧」的人，想建立彼此的連繫。所以，除了12月31日的活動之外，他們也在搭建一個online的cos用品商舖搜尋系統，希望提供更多的途征尋找Cos用品的服務提供者。
經過幾番世代更替，其實不少cosplayer已經把興趣變成了事業，從Cosplay中學懂了化妝、做衣服的技巧，更有退役的cosplayer成為了相關行業的專業人仕，例如化妝師、裁縫和道具師等等。然而，亦有更多Coser得到了相關技能，希望以此營生或賺外快，卻礙於環境艱難，被迫放棄。主辦女成員說：「在Cos圈，不時就會聽到啲人問：『香港邊度有人整衫呀？搵唔到呀，邊度有呀？』但另一邊廂，又有做衫嘅人喺度話：『我冇單接呀…』」她希望透過活動可以將這兩類人「meet together」。
「以前呢啲嘢全部都係underground發生，希望可以透過多啲呢類型嘅活動，令個交流上番地面。你可以話我地幫緊佢地做生意，但重點係幫佢地識人。」他們表示，跨次元部落正在做的工作，就是為本地的ACG產業資訊透明化出一分力。
他們表示，千禧年頭曾經見過有一班年青人開店接單做Cos服生意，但不敵鋪租貴及各種問題而結業，而這種問題，其實每年甚至每月都會發生。雖然現在多以網店形式經營避開鋪租，然而網店同樣有網店的問題。例如不少人都依賴Facebook專頁宣傳，過往「朋友搭朋友」的資訊仍有機會看到，但Facebook「派Post」的準則變得愈來愈奇怪，其他社交媒體亦有類似問題，在茫茫的資訊大海當中，做cos服的人已很難再以社交平台的「朋友搭朋友」的形式接觸新客戶。主辦的男成員更補充，Facebook呈現的世界絕對不是全貌，應該說是非常個人化地度身訂造的。所以讓活動擺脫社交媒體，呈現的面貌可能更實在地反映到本地Cosplay界的狀況。
當然對於cos服店舖來講，更大的問題是在淘寶。「而家好多coser都話寧願用淘寶，不過有時都會中伏，件貨攞上手唔係目錄圖片果樣野之類。活動有一個好處，就係佢地可以面對面見到參展者嘅作品，睇得到，大家可以溝通得到，願意去造服的信心便會大很多。」他們打算利用網上的平台加上實體的活動，希望令Cosplayer更實在地建構屬於本地的經營網絡。
未來願景 日本海外也來香港訂服
「淘寶真正質素好的東西，其實不少都比起香港製作出品的更貴。原材料雖然無可否認要依賴北邊供應，但論到手工手藝，其實本地的Cos服製作者，做工有不少都更加仔細認真，絕對唔係『冇得鬥』，希望大家多多支持本地店家。」
我們也有談到未來的願景。他們表示，除了希望為重建本地cosplay用品的市場盡點力之外，亦希望更多海外的人會加入這個網絡，例如日本和台灣的人。我問，日本人會找海外的人造cos服的嗎？他們回答是有的，因為日本境內造服價格都偏貴，而且會牽涉到版權問題，很多日本人都會訂淘寶的cos服。如果有機會的話，希望香港人也可以收到日本或其他海外的造服委託。
「Cosplay」的產業不是只有model
近年本地也有不少活動標榜「Cosplay」的要素，不過大部分都是跟舞台表演有關，更甚者是以cosplayer作為推廣的工具。對於這點，CosCompass的主辦亦有相當意見。「唔希望大家一諗起Cosplay就只有性感、賣肉，甚至當coser係廉價Model。即使係舞台表演、寫真相集等等，都係藝術嘅表現方式。呈現cosplayer係背後付出嘅價值，先係呢個產業應有嘅面貌。」他們希望「CosCompass」可以展示出屬於Cosplay的不同內容。至於為何會比較強調衣服、道具製作和Cos用品買賣等服務？他們說，舞台上的事情大家會見到，商家也會見到；但與幕後籌備有關的產業，要呈現就很困難了，所以才更應該要重點強調。當然，CosCompass也會有舞台表演、也歡迎出寫真相集的coser或者喜歡攝影的朋友參加，亦會提供相關的地方及節目。
小編：最後，參展組織與表演單位報名其實剩下兩天而已，12月5日就要截止了，想參加的人快趕上尾班車吧！
首屆本地Cosplay綜合博覽「CosCompass」
日期：2017年12月31日(星期日)
地點：柴灣青年廣場（2/F & 6/F）
門票：港幣35元
活動內容：Cosplay用品/服務陳列及博覽會、角色相集及相關物專賣區、舞台表演、交流會、攝影場景
