《品味遊戲：整Game前，停一停諗一諗》

文：Dixon Cheung

最近參加朋友飯局，席間佢話想搞遊戲製作，問我點睇。其實一年當中都有唔少人問呢個問題，亦試過有啲朋友嚟我Facebook留言叫我講吓睇法……不過各位大佬，知唔知呢啲問題唔可以公開作答㗎？揞住良心叫人去馬，基本上就等同推人去死。講話唔好做呢？又話我思想負面，自己冇料發圍賺大錢就喺度踩香港遊戲開發。老老實實，不如我問番大家一句，其實點解要做遊戲先？

喺香港，做任何嘢都好，要做到勿忘初心真係唔容易。不過更大嘅問題係，有啲人做嘢根本就無初心。簡單一句「點解想做遊戲？」，答案通常都係二選一，一係就話自己中意打機，一係就話想賺大錢。雖然呢兩個答案唔係錯，但係可唔可以諗深少少呢個係咪真正原因先？

中意打機所以走去整Game，就好似中意食飯所以做廚師。咁若果整嘅唔係自己想食嘅，咁仲做唔做落去？尤其對於而家讀緊或者考慮去讀遊戲製作嘅朋友，呢個係一個幾重要嘅問題。係人都想做自己中意嘅嘢嚟搵錢，但就算問小島秀夫係咪每隻佢參與過製作嘅Game都係佢中意嘅，我諗佢頂多都只係話：「中意嘅只係一部份」。自己唔中意但依然可以做到最好，做到人地中意玩。呢啲就係作為一個遊戲製作人最需要擁有嘅態度。

我認為作為一位Designer，唔理係打算設計遊戲抑或只係畫一幅廣告畫。只要企喺創作人嘅位置就唔可以淨係做自己中意做嘅事。（齋做自己中意嘅嘢嗰啲叫藝術家）製作遊戲嘅初心係因為「中意打機」唔係問題，問題係中意打機之外，製作人有幾顧及玩家先？

唔係講笑，我真係見過某學校嘅Grad Show係咁，班同學仔嘅FYP同市面上嘅槍Game毫無差別（嚴格嚟講，有差別嘅地方係Graphic比較差）。我問佢哋：「隻遊戲同PUBG有咩分別？」佢哋就話：「我哋加咗嘢㗎！多咗好多武器，玩家血量多咗，跑得快啲囉！我哋諗住搞電競，遲啲搵投資者搞大個遊戲㗎！」

我唔敢亦冇資格話人自high，不過記憶所及，以前冇人會由零開始寫隻市面上已經玩到出咗幾款山寨嘅遊戲囉。加武器、改血量、加跑速，呢啲其實Mod Game都做到啦，何必人整食雞你整食雞？Mod Game聽落當然唔夠Develop Game咁型，不過當年DOTA都係改War Craft起家（唔好講話改Game Rule就要從頭寫，DOTA改咗Game Rule但都繼續用War Craft resource）。曾幾何時有神人Mod隻街頭霸王屠龍版出嚟，改到出昇龍拳時候會順手出一堆波動拳，下下秒殺對方，雙打果陣驚險刺激，大把人排曬隊嚟玩。

既然有能力由零開始去寫Game，點解唔諗多一步，改數值加武器之外俾啲突破性嘅新意出嚟？否則就算冇人話你整老翻，玩家做乜唔幫襯原裝而要玩你嗰隻先？

至於製作遊戲嘅初心係為咗賺錢嘅朋友……係嘅，賺錢係天經地義。尤其而家香港食個Lunch話50蚊起跳，諗咗搵錢先都實在無可厚非。不過遊戲係轉變得非常快嘅行業。今日遊戲大廠玩到有曬動畫同聲優嚟sell隻Game，啲宣傳鋪天蓋地咁喺地鐵站、雜誌甚至電視播出。請問一般平民百姓，你冇條大水喉喺背後，憑乜嘢同人爭曝光，吸引玩家去捧場課金你隻Indie Game？

認識好多人一心諗住度隻遊戲出嚟搵代理、搵投資、搵平台。喺5、6年前，獨立遊戲製作人的確有比較多機遇，但呢幾年投資者漸漸明白到遊戲係一門冇數計，近乎賭博嘅高風險投資。加上睇見《Puzzle & Dragon》、《Pokemon Go》、《刀塔傳奇》一隻隻輝煌過後高峰不再，講求Repeatable Success（可複製的成功）嘅投資者面對冇品牌意識嘅遊戲公司紛紛耍手擰頭。尤其對香港嘅投資者嚟講，用投資金融地產嘅慣性目光去睇遊戲行業梗係冇曬癮。香港獨立團隊不論人力物力，全部都不及中國，想做一兩隻遊戲就搵到投資者跟住上位？唔係冇成功例子嘅，六合彩都有人中頭獎啦。

可能你會話：「你條淡友！政府話大力支持電競，又話攞500億出嚟搞創科喎！」你識咁諗，隔籬屋嗰個都識啦。幾年前，市場上充斥住一班鼓吹「有VR就有未來」嘅人。結果熱熱鬧鬧攞曬政府撥款搞一輪之後，今日依然屹立不倒嘅VR公司好多其實都唔係做VR遊戲，而係走向其他應用範疇。事隔兩年，而家政府又嚟不停推動電競，一班慣性一窩蜂嘅香港人紛紛又轉軚話「電競才是未來」。到底係有心做遊戲，還是只不過係趁機Cap水？作為一般民眾，睇見人Cap我又Cap嘅心態去做遊戲係相當危險。

總言之，整Game前，停一停諗一諗。究竟你整隻遊戲出嚟係為咗令自己開心多啲還是令玩家開心多啲？若果你打算刀仔鋸大樹創造奇蹟嘅，請問清楚自己有冇資本去同財團競爭，同埋長期活於貧窮線以下孤身作戰？

可能你會話：為打機又話唔好，為賺錢又話勁難，咁趕客都唔支持本地創作㗎！

咁又唔係喎。邊個話做本地創作一定要齋諗自己Happy同埋賺錢發達㗎？

即係點？學古天樂話齋，香港人要團結，香港人係要做香港遊戲囉！

下篇專欄再大家分享啦。