《是AppGame殺死了遊戲設計嗎?》

文：Dixon Cheung

最近諗住懷緬一下細個時候玩過嘅遊戲機，順便睇吓本地團隊近期有咩遊戲作品，所以趁K11個遊戲展結束之前去望吓。點知去到現場，見到有個中年男人好興奮咁指住隻《街霸2》，同個掛住篤手機嘅小朋友講佢當年點同人「隻揪」。原來打機都有代溝…. 不過又係嘅，而家人人攞住手機玩食雞、玩皇者榮耀，叫個小朋友擺低手機睇街頭霸王真係十級難度。

手機遊戲嘅冒起的確令玩家更容易接觸到遊戲，亦帶咗好多新嘅機遇俾開發者。但另一方面，過份依賴手機遊戲亦令遊戲設計同製作不知不覺間變得「諗埋一邊」。記得我參加一啲外國嘅遊戲展時候，我留意到大部份香港遊戲團隊都係開發手機遊戲同VR遊戲。明明市場上有PlayStation、Switch、Xbox甚至PC遊戲存在，但偏偏大部份遊戲製作者一諗起整Game就走向手機遊戲。原因好簡單：「冇理由有最簡單，最快嘅賺錢方法唔用㗎嘛！」無錯，手機遊戲可以使用Unity同Unreal呢啲相當成熟嘅遊戲引擎製作，大大降低製作成本同複雜程度，加上完成遊戲之後遊戲亦好輕易就可以上架賺錢。所以精甩邊嘅香港人仲點會同你冒險考慮製作其他嘢？只不過，手機呢個平台係咪適合閣下想製作嘅遊戲呢？

其實遊戲製作同電影製作一樣，都係一門娛樂別人嘅工作（明明係數碼娛樂，但香港好中意乜都話IT…）。未動手設計一個遊戲之前就被手機平台局限咗Target Audience同User Behavior，咁同TVB拍劇鎖定觀眾係電視機前面班師奶嚟寫劇本有咩分別？尤其對於一啲「想整自己中意嘅Game，又想要賺一大筆錢」嘅朋友，若然想做嘅遊戲根本唔符合手機遊戲玩家呢個族群，例如操作模式唔適合觸控屏幕，或者遊戲需要長時間投入（史詩式RPG），強行將遊戲開發響手機平台亦只會招來損失。

遊戲講求新鮮感，但遊戲設計者走向手機平台嘅時候往往會多咗一個名為「營收」嘅包袱。尤其香港遊戲業界一直傾向以收入論英雄，錢賺得多同埋多人玩就等於果個遊戲「成功」。迷失響追逐「成功」嘅時候，開發者好容易會忘記遊戲作為商品之前，遊戲本身嘅存在價值係為咗令玩家覺得「有所得著」（不管係覺得好玩嘅快感，或者係經歷咗一個難忘嘅故事）。一個好玩嘅遊戲自然會有捧場客，但一個令人甘願洗錢嘅遊戲卻唔一定係一個好遊戲。就正如賭場嘅角子老虎機好多人課金，但玩家會唔會覺得角子老虎機係一個好遊戲而專程去賭場打機？

事實上，而家好多PC嘅獨立遊戲跨平台到手機版嘅時候都唔會採用課金機制，寧可用番比較傳統嘅一次性購買。例如著名獨立遊戲《Paper’s Please》、《Terraria》以及ARPG遊戲《Crashland》都係咁嘅例子。對於呢類遊戲嚟講，手機平台唔係一個主要嘅營收場所，佢地嘅遊戲冇必要刻意加入PvP同課金機制嚟搵錢維生。課金機制可以話係因為遊戲要以免費下載吸引更多人去玩而誕生。但呢點對於已經有基本Fans同收入嘅遊戲嚟講已經無咁緊要。跨平台嘅好處係遊戲唔再需要依賴單一嘅營收方式，被營收機制喧賓奪主搶走甚至破壞遊戲平衡（Diablo 3就係一個差啲因為In-Game賺錢而破壞咗遊戲性嘅例子）。

  

曾經有人同我講，唔做手機遊戲就搵唔到錢。其實Unity同Unreal而家都支援跨平台開發啦，遊戲製作人真係冇任何理由要齋做手機遊戲，又或者係將手機平台視為最優先要開發嘅平台。再極端少少，完全放棄手機市場，甚至連Unity同Unreal都唔用，用番幾乎唔需要寫程式嘅RPG Maker嚟製作，一樣都有響Steam度大賣嘅遊戲作品《To The Moon》做成功例子。如果有人話手機遊戲先會賺錢，整其他平台就一定冇運行嘅話，咁《返校》呢款文字冒險遊戲響Steam大賣嘅成功例子又從何而來呢？

作為遊戲設計者，好應該睇清楚想整嘅遊戲適合咩平台，而唔係夾硬遷就個平台整個遊戲擺上去。手機遊戲始終離不開一個5～6寸左右嘅觸控屏幕。屏幕大小、人嘅視力以及手指大細都係不可改變嘅因素。坊間不少遊戲明明就係PC遊戲規模，但製作團隊（又或者係遊戲背後做商業決定嘅人）就夾硬將一大堆UI同功能塞滿整個手機畫面。又或者遊戲需要精細操作，但製作團隊就強行整成俾觸控屏幕操作。例如正身係MMO但就做咗響手機嘅《RO仙境傳說：守護永恆的愛》同埋《永遠的七日之都》。（我同好多人一樣，搞到開Bluestacks用滑鼠嚟打手機MMO，諗番都真係幾反智….）為咗賺手機玩家錢而無視用家體驗，即使一時三刻會覺得新鮮有趣，但耐咗都會因為疲勞嘅關係對遊戲感到厭倦同反感（咁大規模搞隻PC Level嘅手機遊戲，攞嚟短炒？）。

香港一直少有突破性嘅遊戲設計，甚至係近乎冇全職嘅遊戲設計師（雖然我每個月都設計幾款遊戲，但都未能稱為全職嘅遊戲設計師）。呢個問題業界人士嘅指定動作當然係話香港市場細，人才不足，政府唔夠支持，玩家唔撐本地製作之類啦。但其實上次嘅專欄我都表示過，除咗外在嘅環境因素之外，部份原因我覺得係來自「做遊戲嘅初心」有問題（詳情請睇番上期專欄 ）。當「初心」包括咗種種「精明」嘅計算，大部份人都會選擇行條最安全就可以賺大錢嘅路。當世界各地遊戲製作人卻係充份利用遊戲呢個「工具」去展現佢地團隊嘅個性同想法，有人整手遊、有人整VR/AR，但亦有人整PC同Console遊戲，甚至見過有人攞啲用過嘅膠樽嘅整Game或者係砌咗個兩三米高嘅機械人響入面操作嚟打機，我地香港人就響度恥笑呢班製作人整出嚟嘅野賣唔到錢….  大家有冇諗過，其實可悲嘅係我地香港人，所謂嘅創意，只係停留響個手機屏幕嘅小小畫面當中，諗住點樣可以賺大錢？

 

上期專欄：《品味遊戲：整Game前，停一停諗一諗》