《銀魂2》突破次元障壁 真人化成功的典範

文:Adam

「阿銀,你已經有幾個月無交租啦 ~ 」我相信好多有追開銀魂既讀者對呢句一定唔會陌生,阿銀同時都比呢一句說話煩足十五年,同時又陪同左我渡過左十五年。單單呢一句就已經想比錢入場睇,跟著阿銀會點樣面對無錢交租嘅情況。同一句說話,同一個開場,無論係漫畫定動畫,都出現過好多好多次,而收睇同一個情節,戲院內嘅大家都比足面,拍手大笑當然不在話下。

被登勢大嬸催交租,被迫接唔想做既嘅工作之下,神推鬼接左將軍私下偷偷外出玩樂嘅接待工作。一連兩個相關嘅短篇「將軍接待篇」,再導入「真選組動亂篇」,劇情在搞笑輕鬆嘅氣氛之下慢慢進入主線劇情,毫無冷場,再加上不少在地化嘅翻譯對白,簡單易明,令笑位生色不少。

《銀魂2:規矩是為了被打破而存在的》用上原班動畫聲優,再加上陣容豪華嘅演員。有睇上一集真人版電影嘅觀眾覺得演員對角色嘅還原度不足,好多對白都係照稿讀,如果唔係因為銀魂呢個名,可能未必比錢入場睇。

而呢集,無論係三大主角,坂田銀時:小栗旬,志村新八:菅田將暉,神樂:橋本環奈,在對角色嘅了解,對白嘅演譯,各人之間嘅同步,比起上一集都有好大進步。特別在神樂:橋本環奈,顏藝嘅演出更上一層樓。在第一個短篇之中,神樂為左為成陪酒女之一,化上大濃妝,跟少女神樂嘅形象格格不入,本場最大笑點之一。

[以下內容會有小小小量劇透]

真人版要還原動漫畫劇情嘅難度向來就十分高,而「將軍接待篇」中將軍被各人玩弄嘅尷尬場面,特效CG,都十分到位。「真選組動亂篇」,無論係土方嘅內心戲,角色二重性格嘅轉換都唔生硬。土方比啊銀一行三人發現隱藏人格喺呢段戲係一大笑點,電影版演釋得有幾成功?由觀眾笑聲不斷就睇得到。

在打鬥場景方面,雖然演員表現一般,勝在CG特效搭救,劇情還原,取長補短,以動畫真人版算係做得相當用心。當然銀魂你唔會期望佢有咩出色CG,而佢CG做出來嘅感覺恰好又做到果種2.5次元嘅感覺,以低成本做出高質素效果,值得一讚。明刀明槍嘅打鬥有時過份使用慢鏡,整個節奏唔順暢,成場戲唯一嘅缺點。

整體來說,《銀魂2》娛樂性十分之高,對追隨多友嘅讀者,抱住追演員聲優嘅粉絲,或者純粹陪朋友睇無接觸開嘅觀眾,都喺一個十分唔錯嘅體驗。

發佈留言

發佈留言必須填寫的電子郵件地址不會公開。