《品味遊戲:阿Sir,我想做遊戲設計師。》

文:Dixon  Cheung

一年容易又放榜,年年都聽到同學仔問「點樣先可以成為一個遊戲設計師」、「整Game人工幾多錢」,甚至有研究調查話小學生嘅「我的志願」頭三名係明星、運動員同遊戲設計師。其實咩係「遊戲設計師」?遊戲設計師嘅工作又係咩?與其繼續FF落去,今次我想借《品味遊戲》以最貼地嘅方法講一下「遊戲設計師」呢個職業。

好多人以為自己係廚師,其實只係食家

我諗大部份人對遊戲設計師都存在咗兩個好致命嘅誤會。第一個誤會係:「鍾意打機」、「覺得人哋整嘅game好垃圾」、「俾我整會點點點」就等於想做遊戲設計師。好抱歉,其實呢啲全部都唔係一個遊戲設計師應有嘅思維。「鍾意打機」又如何?難道鍾意食飯就等於想做廚師?相比鍾意打機,大部份真正嘅遊戲設計師更喜歡解構遊戲,搵出遊戲成功以及失敗嘅地方,不斷尋找各種遊戲增加自己見聞。同任何設計方面嘅工作一樣,遊戲設計師必須具備探求心,甚至刻意尋找主流之外嘅其他選擇。即使一款遊戲唔係自己喜歡玩嘅類型都需要深入研究。咁做唔係為咗標榜自己玩得多或者更容易睇到邊個遊戲好垃圾,而係為咗有更多工具去同合作製作遊戲嘅人溝通,有更多例子隨時可以攞出嚟協助其他人完成一件事。

「概念等於放屁,真正整到出嚟先係真理」

美國嘅遊戲業界有一句說話:「概念等於放屁,真正整到出嚟先係真理」。呢句說話意思係Idea每個人都有,而且每個人都覺得人哋嘅嘢唔掂,自己嘅就冇問題。就好似放臭屁咁,總係覺得人哋嘅好臭,但就唔覺得自己放嘅有問題。之但係,放完個屁之後,下一步點呢?呢個「點呢」其實先係遊戲設計師工作嘅第一步。

第二點誤會係,遊戲設計師嘅工作其實同「打機」並無必然嘅關係。若果以為遊戲設計就等於整手遊、PC、家用機嘅 Game的話,就實在係大錯特錯。你究竟係想做遊戲設計師,還是想做「電子遊戲設計師」?如果係後者的話,好可惜,呢個職位響香港基本上唔存在。原因係香港大多數嘅遊戲公司無論響執行或營運上都冇空間開闢「遊戲設計師」呢個崗位。即使係響外國,通常都只係有相當規模嘅遊戲公司(例如Ubisoft、Square Enix、Bethesda、Rockstar)響開發大型遊戲嘅時候先會有「遊戲設計師」呢個職位。開發《Grand Theft Auto》或者《Elderscroll》就需要用到遊戲設計師,但整隻關關都一樣玩法,齋靠扭蛋組隊嘅課金遊戲……計數啫,條Team入面搵人搞埋得啦。尤其響有限嘅資源底下,遊戲設計呢方面嘅工作通常都會落響核心成員身上(例如老細同高層),根本唔會浪費資源去搵一個專職只係管理遊戲設計嘅「遊戲設計師」。所以,剛剛畢業嘅朋友,請問一個已經合作無間嘅核心小組為乜要俾錢請一個只係攞住d「好正嘅橋」嘅人?當「度橋諗Game」嘅Demand唔高嘅時候,你仲有咩可以攞出嚟爭取工作機會?

遊戲設計真係搵到食?

睇到呢度可能你會話:「遊戲設計真係搵到食?」學遊戲設計其實唔只一條出路,你學識嘅係一套設計思維,一套執行能力,好多地方都可以應用得到。正如上面所提及到,「遊戲」並不等於「電子遊戲」,遊戲設計所觸及嘅範疇亦往往都同打機無關。尤其係當「遊戲化」(Gamification)對「用戶體驗設計」(User Experience Design)嚟講變得越來越重要嘅時候,遊戲設計師所面對嘅工作又點會只係埋頭整Game打機咁簡單?響2018年嘅今日,博彩公司嘅遊戲操作、商品展覽宣傳推廣、消費者品牌忠誠度操作、企業管理、醫療護老、教材設計,各式各樣嘅用戶體驗當中都需要用到「玩」呢個元素。所以遊戲設計師嘅有趣之處並非在於設計遊戲,而係面對職業生涯當中冇一個Project會重複,每次都係憑住經驗同設計視野去作出新嘅挑戰。遊戲設計師未必係一個團隊入面最叻果個,但佢一定要係視野最廣同腦筋最靈活果位。

想做遊戲?升以下技能就對了!

「遊戲化」同「用戶體驗設計」係兩個大題目,以後嘅專欄入面我可以同大家再作分享。講番大家最關心嘅「電子遊戲設計」先。假若真係有機會動手設計一款電子遊戲的話,閣下除咗舉世無雙嘅絕世好橋之外,有三樣嘢係設計遊戲嘅過程當中必需嘅:

  1. Programmer嘅思維
    憑空構思或者攞張紙寫低嘅並不等於可以化為現實。作為一個遊戲設計師,你即使唔識寫Program、唔識用Unity同Unreal,但最少都要知道Programming Logic。咩係Modular Programming,點樣分拆一個複雜嘅Task成為多個Component去完成,整個程式流程嘅走向。一個正規嘅遊戲設計師唔係齋俾一個概念Programmer然後叫Programmer獨力完成,而係需要同Programmer一齊研究想做嘅功能,一同搵方法克服各個難題,並且響合理嘅人力同時間資源內完成件事。
  2. Artist嘅美術觸覺
    美術方面,遊戲設計師亦唔可以叫Artist「睇吓其他Game」就算。遊戲設計師必須具備對各類遊戲有一定嘅了解,並且響「用家體驗」(User Experience)上俾到一個清晰嘅指示負責美術嘅同事。尤其係響介面嘅設計方面,點樣令到一個玩家操作遊戲嘅時候覺得舒服係遊戲設計嘅核心之一。響我多年嘅遊戲設計工作當中,最常做嘅就係繪製UI Layout。即使閣下毫無美術天份甚至係唔識畫畫,但最起碼你都需要知道乜嘢嘅介面設計係合理,點樣改良介面,同埋響無止境嘅改良過程當中不斷挑剔自己嘅設計並且堅持到作品面世。

  3. Sales嘅口才
    雖然以上兩點非常重要,但總算係可以訓練出嚟。唯獨最後呢個需求講求嘅係個人嘅性格同修養。無論你嘅設計幾精彩,無法傳遞令其他人明白的話就只會係一文不值。一個唔出聲或者唔擅長表達自己嘅遊戲設計師係冇可能做好呢份工作。呢點對於好多唔習慣或唔鍾意同人溝通嘅朋友嚟講係極大挑戰。遊戲製作始終係一個團隊工作,設計師響一個團隊當中絕對唔係高高在上指揮其他人嘅獨裁者。更多時候,一個遊戲設計師嘅身份係近似談判專家或者係社工咁,要盡力安撫各方令團隊入面每個人都發揮所長之餘亦可以完成老細委派嘅工作。唔鍾意出聲、唔鍾意
    發表意見嘅同學們,你唔會一世都只同你最熟嘅朋友合作做遊戲。跨不出去嘅話我衷心勸諭你唔好害人,一個人整吓獨立遊戲都有發達嘅。

「遊戲設計」四個字令人充滿幻想,尤其係媒體不時報導各大遊戲公司總監嘅訪問,唔明白業界真實狀況嘅朋友真係可以離曬地無限FF。但假若將心比心,換你做老細,你會洗幾萬蚊搵個砌程式同畫圖嘅技術人員,還是請個人番嚟坐吓諗吓度吓整乜game?當呢筆錢係每個月響你自己口袋流出嘅時候,你仲能唔能夠大大聲同人講「冇錢請Game Designer就執咗佢咪響度整糞Game」?想整Game唔係問題,不過返落嚟地球先啦。

Dixon

擁有超過30年遊戲玩家經驗,熱愛挖掘全球各地不同遊戲,涉獵範圍包括:家用遊戲機、電腦遊戲、手機遊戲和卡牌桌遊等。曾任職廣告公司擔任創作總監,擅長將遊戲引入各種企劃當中。於2013年創立獨立遊戲開發團隊Fingerprint Studio,先後獲得多個香港及海外獨立遊戲大獎。 Facebook Page: www.fb.com/dixon.gamer

More Posts

Follow Me:
TwitterFacebook

Dixon

擁有超過30年遊戲玩家經驗,熱愛挖掘全球各地不同遊戲,涉獵範圍包括:家用遊戲機、電腦遊戲、手機遊戲和卡牌桌遊等。曾任職廣告公司擔任創作總監,擅長將遊戲引入各種企劃當中。於2013年創立獨立遊戲開發團隊Fingerprint Studio,先後獲得多個香港及海外獨立遊戲大獎。 Facebook Page: www.fb.com/dixon.gamer

發佈留言

發佈留言必須填寫的電子郵件地址不會公開。